Këtë të martë Këshilli i Sigurimit Kombëtar do të mblidhet me urdhër të presidentit Bajram Begaj, kjo për të diskutuar mbi gjendjen e sigurisë kibernetike dhe masat e marra për forcimin e mbrojtjes kibernetike në Republikën e Shqipërisë.
“Thirrja e mbledhjes së Këshillit të Sigurimit Kombëtar synon të bëjë një analizë gjendjes aktuale të sigurisë kibernetike, sfidave dhe kërcënimeve me të cilat përballemi në këtë drejtim. Insititucionet përgjegjëse do të informojnë Këshillin e Sigurimit Kombëtar për masat e marra për forcimin e mbrojtjes kibernetike në zbatim të rekomandimeve të dhëna nga mbledhja e Këshillit të Sigurimit Kombëtar, në muajt Tetor 2022 dhe Janar 2023”-thuhet në njoftimin e bërë nga zyra e shtypit e presidencës.
Të pranishëm pritet të jenë, kryeparlamentarja, Lindita Nikolla, kryeministri Edi Rama, drejtori i Përgjithshëm i Policisë së Shtetit, Muhamet Rrumbullaku, drejtoresha e SHISH si dhe disa prej ministrave të kabinetit qeveritar. Për kryetaren e re të Shërbimit Informativ Shtetëror, Vlora Hysenin mbledhja e këshillit të Sigurimit Kombëtar do të jetë e para që pasi mori detyrën në 3 prill të këtij viti.