“Në kohën që kam qenë ministër dhe sot nuk kam patur dhe nuk kam asnjë interes ekonomik e financiar me kompanitë farmaceutike në Shqipëri, apo pronarët e tyre”,-tha ish-ministri i Shëndetësisë, Ilir Beqaj, pas daljes nga SPAK. Ai mohoi të ketë lidhje me kompanitë farmaceutike dhe u shpreh i hapur ndaj drejtësisë, teksa foli edhe për kontrollin e djeshëm në shtëpinë e tij.
“Së pari ministri nuk menaxhon fondet huaja, nuk bën tendera, koordinon financimet e huaja ëpr qeverinë. Në kohën që kam qenë ministër dhe sot nuk kam patur dhe nuk kam asnjë interes ekonomik e financiar me kompanitë farmaceutike në Shqipëri, apo pronarët e tyre unë prej vitesh po përballem me këto çështje dhe jam i hapur ndaj drejtësisë. Edhe dje u bë një kontroll në shtëpinë dhe nuk ishte e nevojshme të thërrisja avokatin. Unë si çdo të premte paraqitem para hetuesve me një procedurë të thjeshtë për çështjen e sterilizimit. Ende pres të shoh kush është faji që kam bërë, por pres vendimin e gjykatës. Ata që bënë kontrollin më treguan një vendim gjykate në procesin e një hetimi që bëhet ndaj një personi tjetër”.
Prej ditës së djeshme, Byroja Kombëtare e Hetimit, e mbështetur nga Policia e Shtetit, është duke zhvilluar kontrolle në disa depo farmaceutike dhe farmaci në kryeqytet. Kontrollet janë për llogari të një hetimi mbi marrëdhëniet kontraktore të subjekteve farmaceutike me Ministrinë e Shëndetësisë, gjatë kohës që ky dikaster drejtohej nga Ilir Beqaj.