Ish-kryeministri Sali Berisha tha se Basha i ankohej ambasadores amerikane Yuri Kim se “çdo gjë në PD e kontrollon Berisha”.
Ai shtoi se ka pasur burime të mëvonshme që Basha ka bërë denoncimin për çështjen e ‘non grata’-s dhe se vendimi për përjashtimin e tij u mor pa asnjë fakt dhe dokument.
“Mua më është thënë muaj nga Uashngtoni më parë se Basha i thoshte ambasadores Yuri Kim që ‘çdo gjë në PD e kontrollon Berisha’. Gjer në atë shkallë arriti sa duhet të dalim të bisedojmë në ballkon, sepse kemi frikë se ai mund të vendosë përgjues.
Përpos kësaj, më kanë thënë se Basha e ka bërë këtë denoncim (e ka fjalën për shpalljen ‘non grata’). Vendimi u mor pa asnjë fakt dhe dokument. Administrata e SHBA-ve vetë e ka vlerësuar qeverinë time kundër korrupsionit. Keni fjalën e Hillary Clinton në 2012, ku thotë se kushdo që të shohë demokracinë në veprim, të vijë e ta shohë në Shqipëri”, tha Berisha.