Kreu i PD Sali Berisha sapo ka dalë nga banesa e tij, për t’u nisur drejt zyrave të SPAK. Berisha është thirrur këtë të mërkurë në SPAK, ndërsa hetimet ndaj tij për dosjen “Partizani” janë drejt fundit.
“Më i motivuar se kurrë për ti dhënë përgjigje këtij zotërisë. Më i motivuar se kurrë për fitoren dhe të gjitha. Rama ka zgjedhur mënyrën atërore për të siguruar mandatin e katërt por do t’ia djegim’”-tha Berisha.
Në SPAK, mësohet se Berishës do i komunikohet akuza e Strukturës së Posaçme. Në SPAK gjithashtu do të paraqitet edhe dhëndri i tij, Jamarbër Malltezi. Në orën 12:00 do t’i komunikohet akuza Berishës, ndërsa në orën 14:00 Malltezit.
Sali Berisha është në arrest shtëpie që në dhjetor 2023. Ai ndodhet nën hetim për veprën penale të korrupsionit, bashkë me dhëndrin e tij, Jamarbër Malltezi. Ky i fundit akuzohet nga SPAK se ka përfituar të ardhura në vlerën e 5.4 milionë eurove nga një biznes ndërtimi në mënyrë të parregullt, nga vendimet e qeverisë të marra nga vjehrri.
Berisha dhe Malltezi kanë kundërshtuar të dy akuzat, duke thënë se hetimet janë të orkestruara.