Sali Berisha ndodhet në Elbasan për Ditën e Verës, ku edhe ka vizituar familjen elbasanase Dinaku, së bashku me kandidatin e tij për zgjedhjet lokale, deputetin Luçiano Boçin. Berisha tha se është i nderuar që ndodhet aty teksa ka shtuar se Elbasani do të kurorëzohet me fitore me datë 14 Maj.
“Jam shumë i nderuar që jam sot këtu. Ju falenderoj shumë për këtë mikpritje dhe për të gjithë gjithë mbështetjen që familja juaj e nderuar i ka dhënë jetë PD-së, përpjekjeve të saj, mbështetjen që ju i jepni sot, Luçiano Boçit, i cili na nderon të gjithëve ne me vetitë, moralin, me zotësinë e tij.
Unë e di që ju po bëni gjithçka për fitoren e tij dhe jam shumë optimist, se ky mundim dhe kjo përpjekje e juaja, së bashku me përpjekjen e Luçianos dhe të gjithë demokratëve të Elbasanit do të kurorëzohet me fitore në datën 14 Maj. Ndërron natyra, ndërron shoqëria, ndërron pushteti. Këto janë lajmëtaret e këtyre ndryshimeve të mëdha. Në gëzime ju ardhshim gjithmonë, dhe gjithnjë e më mirë ta presim këtë ditë. Kësaj radhe me ndryshime të mëdha për vitin tjetër. I lutemi Zotit”,-tha Berisha.
Gjatë kësaj vizite është përmendur edhe Lulzim Basha, të cilin Berisha e ka quajtur një zhgënjim të madh teksa ka thënë se kjo ndjesi ishte edhe më e madhe për shkak se ish-kreu i PD përfaqësonte një gjeneratë të re.