Sali Berisha në një prononcim për mediat në Podgoricë, gjatë samitit të PPE-së, tha se narkoshteti në Shqipëri është pengesa kryesore e integrimit të Shqipërisë në BE. Ai theksoi se në samit ka paraqitur realitetin shqiptar dhe pikëpamjet e PD mbi proceset e integrimit të Shqipërisë dhe rajonit.
“Shqipëria si narkoshteti i parë dhe i vetëm në Europë, është jo tërësisht i njohur si i tillë. Mora komente shumë pozitive nga të pranishmit për diskutimin që pata. Ishte një diskutim i hapur, natyrisht isha i vetmi opozitar në panel, pasi të tjerët përfaqësonin qeveri.
Përfaqësoj opozitën dhe kam pikëpamje të ndryshme për ngadalësinë e procesit të integrimit që është tërësisht nga faktorë lokalë. Nga mosrespektimi i standardeve demokratike, nga penetrimi i thellë i krimit në qeverisje. Në Shqipëri konkretisht narkoshteti, nga përdorimi i terrorit politik për të marrë vota dhe mandate”.
I pyetur se si u prit rikthimi i tij në EPP pas shumë kohësh, Berisha u përgjigj: ”U prit në mënyrë të shkëlqyer. Ky rikthim i llojit të tij është epik, ndaj dhe miqtë e vjetër i takova dhe më përgëzuan. Natyrisht edhe vendosmëria e tyre. Shqipëria nuk është ajo që ishte. Njohuritë për Shqipërinë janë krejt të tjera sot. Rama do t’i ketë kohërat të pamundura të manipulojë, siç ka manipuluar gjer sot opinionet”.