Sali Berisha ka prezantuar këtë të hënë kandidatin e koalicionit “Bashkë Fitojmë” për Bashkinë Gramsh, Hasim Çekrezi. Berisha pohoi se përpara me Edi Ramën do të thotë drejt shkatërrimit dhe asgjësimit të familjes dhe gjinisë njerëzore, teksa ka bërë thirrje që në 14 Maj të votohen kandidatët e koalicionit “Bashkë Fitojmë” të cilët i konsideron ndryshimi.
”Në shekuj e mijëvjeçarë ne na ka mbajtur familja. Pa diskutim, ajo ka qenë streha, votra e cila ka garantuar jetesën dhe mbijetesën tonë. Çfarë duan të bëjnë këta. Këta duan të shembin familjen dhe gjininë. Po, po. Këta po fusin në shkolla dhe kopshte, e kanë filluar në Tiranë gjerësisht, prindi 1 dhe prindi 2.
Këta fillojnë dhe i pyesin fëmijët nëpër kopshte, çfarë gjinie preferon. Këta ecin me një platformë të degradimit të familjes shqiptare. Të degradimit të plotë të shoqërisë shqiptare.
Njeriun që nuk di se kush është. A mund të vazhdojmë ne kështu, a duhet të ndalojmë ne këtë agresion të tmerrshëm që bëhet ndaj familjes dhe vlerave të saj. Përpara me Edi Ramën do të thotë drejt shkatërrimit dhe asgjësimit të familjes dhe gjinisë njerëzore. Ndaj dhe në 14 Maj, votojmë ndryshimin, ndryshimi është në duart tuaja dhe ne jemi të sigurtë se së bashku fitojmë”,-tha Berisha.
Gjatë fjalës së tij, ish-kryeministri tha edhe se kryeministri Edi Rama ka marrë lopatën se gjoja po mbjellin pemë, teksa i ka akuzuar duke pretenduar se duan të fshehin vjedhjen me 1 milionë pemët në Tiranë.