“Big brother Albania” sapo ka nisur rrugëtimin e një edicioni të veçantë, me personazhe VIP, dhe do të jetë në ekranin e Top Channel, deri në janar.
Mbrëmjen e djeshme në premierën e madhe u zbuluan 14 personazhet e parë, që ishin: Ilir Shaqiri, Sheila Haxhiraj, Donald Veshaj, Rudina Demneri, e njohur si Paloma. Gjithashtu Elhaid Cufi, Beniada Nishani, Sabiani, Semi Jaupaj, Granit Cana, Kledi Hysa, Arjona Demiri, Fifi, Ardit Cuni dhe Monika Lubonja janë emrat e parë në këtë “Big Brother”. Me karaktere dhe profesione të ndryshme, personazhet premtojnë spektakël dhe të papritura, ndonëse ka patur kritika apo “rezerva” për ta në rrjet, që në nisje.
Ndaj, kjo e ka bërë moderatoren Arbana Osmani, të marrë një vendim të rëndësishëm, menjëherë pas puntatës së parë. “Nga nesër e deri në ditën e fundit të këtij ‘Big Brother VIP’, nuk do lejoj as edhe një koment fyes a ofendues karshi pjesëmarrësve të këtij formati në llogarinë time”, shkruan moderatorja në Instastory, duke shtuar se kushdo që do të komentojë duke fyer dhe duke mos treguar respekt, do të bllokohet, pasi sipas Arbanës ky është minimumi.
Ndërkohë, “Big Brother Vip” mund të ndiqet 24 orë në dy kanale te dedikuara ne DigitAlb. Nën produksionin e Lori Hoxhës, si dhe me komentet e Balina Bodinaku dhe Arbër Hajdarit, ky reality-show do të na shoqërojë deri në fillim të vitit tjetër.