Ish-presidenti amerikan Bill Clinton tha në një intervistë për RTÉ se i vinte keq që e bindi Ukrainën të hiqte dorë nga arsenali i saj bërthamor në vitin 1994. Sipas tij, Rusia nuk do të kishte pushtuar Ukrainën nëse Kievi do të kishte një parandalues bërthamor.
“Ndjej se kam një përgjegjësi personale, sepse i binda ata (Ukrainën) të pranojnë të heqin dorë nga armët e tyre bërthamore. Rusia nuk do të kishte pushtuar nëse Ukraina do të kishte ende armët e saj”, tha ai.
Pas rënies së Bashkimit Sovjetik në vitin 1991, Ukraina ishte fuqia e tretë më e madhe bërthamore në botë. Por në vitin 1994, pas bisedimeve midis SHBA-së, Rusisë dhe Ukrainës, Clinton njoftoi se Ukraina kishte rënë dakord të largonte armët bërthamore nga territori i saj.
Në vitin 1994, Presidenti ukrainas Leonid Kuchma, Presidenti rus Boris Yeltsin, Presidenti i SHBA Bill Clinton dhe kryeministri britanik John Major nënshkruan Memorandumin e Budapestit, ku Ukraina ra dakord të heqë të gjitha armët bërthamore nga territori i saj në këmbim të garancive të sigurisë nga nënshkruesit, SHBA, Britania e Madhe dhe Rusia.
“Ukraina kishte frikë ti dorëzonte sepse besonte se kjo ishte e vetmja gjë që i mbronte nga një Rusi ekspansioniste”.
Në shkurt 2014, Rusia pushtoi dhe aneksoi gadishullin e Krimesë nga Ukraina, duke shkelur mes marrëveshjeve të tjera edhe Memorandumin e Budapestit.
“Kur i pëlqeu, presidenti Putin e theu atë dhe mori Krimenë të parën. Dhe ndihem tmerrësisht keq për këtë, sepse Ukraina është një vend shumë i rëndësishëm”, tha Clinton.