Opozita zhvillon sot protestën e radhës para Parlamentit, siç e ka paralajmëruar në orën 10.00.
Ndërkohë policia ka nisur zbatimin e planit të masave, ku Forcat Shqiponja, FNSH dhe Garda janë në terren në godinën e seancave plenare për mbarëvajtjen e kësaj proteste. Rreth 800 efektivë policie janë vendosur përreth Kuvendit.
Ana e pedonales është bllokuar me skela. Ish deputetët e opozitës, tashmë pa mandat parlamentar i kanë bërë thirrje një ditë më parë qytetarëve të marrin pjesë në protestën që vjen pothuajse një muaj pasi deputetët morrën vendimin për të djegur mandatet.
Ish deputetët e LSI-së, një ditë më parë postuan një video të organizuar nga forumi i tyre rinor si të mbrohen nga gazi lotsjellës. Ndërkohë që ata të PD-së, bën thirrje të ishin më herët para Parlamentit, pas deputetët e maxhorancës do të hynin më herët në Kuvend, rreth orës 09.30.
Për të shmangur çdo incident në mbrëmje, Policia e Shtetit e rrethoi perimetrin e sheshit rrethues të Parlamentit me kordon hekuri.
Ky kordon do të jetë vija që nuk duhet kaluar nga protestuesit, përpara se ndaj tyre Policia të përdorë njësoj si në protestat e tjera gaz lotsjellës. Në protestën e fundit të zhvilluar një javë më parë, Basha deklaroi se opozita nuk do ta njohë më Policinë e Shtetit, e cila, sipas tij, është vënë e gjitha në shërbim të Kryeministrit Rama.