Me vendim të Gjykatës së Posaçme të Apelit, ish-deputeti i Partisë Socialiste, Alqi Bllako do të rikthehet në burg për çështjen e inceneratorëve. Avokati i tij, Sokol Hazizaj tha se nuk ka akoma në dorë arsyetimet e Gjykatës së Posaçme të Apelit. Me ironi ai tha se gjykata është kthyer si një fabul popullore, “ik se të vrara, dhe zbrit se të vrava”.
“Nuk e di se për cilat arsye, përkundër sjelljeve të Bllakos, që ka lënë mandatin e deputetit, të vendosej kjo masë. Është paraqitur para organeve të drejtësisë. Si mund të prishë provat kur hetimi ndaj kësaj çështje është duke përfunduar. Se mendoj se kishte arsye që gjykata e Posaçme e Apelit të mbante qëndrim ndryshe.
E vërteta është se në këtë vend, në këtë gjykatë është kthyer një fabul popullore “ik se të vrara, dhe zbrit se të vrava”, për të njëjtat arsyeje për të njëjtat shkaqe procedurale. Gjykata e Apelit mbajti qëndrim të cilin se ka arsyetuar akoma. Bllako u lirua më herët se nuk përbente rrezik për prishjen e provave. Ajo që nuk kuptoj është se ‘arresti me shtëpi’ dhe ‘arresti në burg’ janë e njëjta gjë. Bllako erdhi vetë në gjykatë se nuk përbën rrezik. Bllako në rastin konkret nën hetim, nuk është person i zgjedhur, referenca ndaj tij është e gabuar. Do bëjmë rekurs në Gjykatën e Lartë”.