Negociatori i Rithemelimit, Luçiano Boçi ka reaguar përmes një statusi në profilin e tij zyrtar në “Facebook” lidhur me çështjen e zgjedhjes së Presidentit të ri të Republikës, ku tha se grupi i Partisë Demokratike nuk ka miratuar asnjë dokument kriteresh për këtë gjë.
Boçi shtroi gjithashtu se Alibeaj po përpiqet të paraqesW një opozitë false dhe kjo duhet të marrë fund, pasi Partia Demokratike ka organet e veta vendimarrëse.
Postimi i tij i plotë:
Kjo e folura dhe paraqitja e vendimeve personale në emër të Grupit parlamentar të PD-së përpos që është qesharake, mbetet një hile bajate, për të marrë atribute të paqena dhe për të mbajtur gjallë një përçarje që dihet se kujt i shërben.
Grupi Parlamentar i PD nuk ka miratuar asnjë dokument kriteresh apo procedure për zgjedhjen e Presidentit, siç e paraqet z. Alibeaj.
Nuk ka pasur as vendim të Kryesisë së grupit parlamentar, as mbledhje të grupit, as takim me kuorum për ta quajtur mbledhje grupi dhe as dakortësi në takimet pa kuorum.
Ky lloj keqpërdorimi i sinqeritetit dhe dëshirës së deputetëve të PD-së për të negociuar dhe propozuar Presidentin duhet të marrë fund.
PD ka organet e saj vendimmarrëse dhe ka miratuar rezolutën për zgjedhjen e Presidentit në Këshillin Kombëtar.
Grupi parlamentar është i unifikuar në idenë që është opozita ajo që duhet të propozojë.
Çdo përpjekje e Alibeajt për të paraqitur një opozitë false të emëruar nga Rama-Balla për të shpëtuar faqen e Ramës në sy të botës, nuk pranohet.
Ne do të vazhdojmë misionin e PD-së për të përafruar qëndrimet për procesin dhe emrin me të gjithë partitë opozitare në nivel politik e parlamentar.