Kryeministri i Britanisë së Madhe, Boris Johnson do të japë dorëheqjen sot si lider i konservatorëve, derisa pritet të vazhdojë detyrën si kryeministër deri në vjeshtë, shkruan BBC.
Gara për kreun e ri të konservatorëve do të zhvillohet gjatë verës.
“Kryeministri ka folur me Graham Brady dhe ka rënë dakord të largohet në kohë për t’ja lënë vendin një udhëheqësi të ri në konferencën e tetorit”, ka thënë një burim për BBC.
Dorëheqja vjen pas një numri rekord dorëheqjesh në kabinetin qeveritar.
Deputetët rebelë konservatorë e paralajmëruan mbrëmë kryeministrin se do të ndryshojnë rregullat e partisë në mënyrë që ai të shkarkohet si lider, me disa që thonë se ai mund të “largohet deri në fundjavë”, sipas mediave të huaja.
Ata i thanë kryeministrit se do të përballet me kërcënimin e një tjetër votëbesimi javën e ardhshme, e cila do të shkaktonte një garë lidershipi nëse ai humbet. I pyetur se çfarë do të ndodhë nëse Johnson refuzon të japë dorëheqjen, një drejtues rebel mbrëmë u përgjigj: “Luftë”.