Një akt normativ në fuqi i qeverisë, parashikon që qytetarët duhet të mbajnë maska në ambientet e mbyllura, në kuadër të masave kundër covid19.
E vërteta është se në radhë të parë janë vetë deputetët dhe ministrat që nuk e zbatojnë këtë masë.
Deputeti socialist, Erion Braçe, ka kritikuar ashpër kolegët e tij, për papërgjegjshmërinë e lartë në zbatimin e masave.
“Çfarë po bëjmë ne këtu bashkë, po sfidojmë rregullat që kemi vendosur. Pse t’u kërkojmë qyetarëve të mbajnë maska, kur këtu në sallën e Kuvendit, përcillet mesazhi shumë qartë: nuk ka rrezik, nuk duhet të mbajmë maska. Në vendet fqinje maskat po mbahen edhe në ambiente të hapura. Çfarë mesazhi po përcillni. Puthuni, përqafohuni, lidhuni, mos mbani maska. Këtë mesazh po japim”, tha Erion Braçe.
Ish-zv.kryeministri paralajmëroi se një mbyllje tjetër do të ishte asfiksuese për ekonominë shqiptare.
“Buxheti i vitit 2022 është tavani i hapësirës fiskale që kemi. Çdo rrezik që do t’i vijë ekonomisë nga pandemia, do na fusë në rrugë pa krye. Deri sot ka paguar qeveria, por do vijë momenti që këto do të jenë më të shtrenjta, për shkak të pamundësisë. Çfarë duhet të bëjmë? Të vinë të na vendosin gjoba për maskat?. Si mund të dalim ne jashtë, a kemi moral”, tha Erion Braçe.