Për herë të tretë marrëveshja për Brexit rrëzohet në parlamentin britanik, duke e futur vendin në një krizë të thellë politike. Pavarësisht se premtoi dorëheqjen në rast miratimi, kryeministrja Theresa May sheh planin e saj për shkëputjen nga blloku të dështojë sërish. 344 deputetë në Dhomën e Ulët votuan kundër marrëveshjes, 286 e mbështetën atë.
Kryeministrja May nuk e fshehu zhgënjimin, pas rezultatit, për të cilin tha se ka pasoja të rënda.
Theresa May, kryeministre e Britanisë se Madhe nënvizoi: “Zoti kryetar, kam frikë se kemi arritur kufijtë e këtij procesi. Kjo Dhomë ka refuzuar daljen pa marrëveshje, ka refuzuar anulimin e Brexit dhe të gjitha variantet e marrëveshjes. Por kjo qeveri do të ngulmojë për të arritur Brexitin, ashtu siç kërkon rezultati i referendumit”.
Por për kreun opozitar laburist, May duhet të bëjë gati valixhet.
Jeremey Corbyn, kryetar i laburistëve tha në fjalën e tij: “Zoti kryetar, rezultati ishte i qartë; marrëveshja duhet të ndryshojë dhe nëse kryeministrja nuk e kupton këtë atëherë ajo duhet të largohet jo në një datë të pacaktuar, por tani, në mënyrë që ne të vendosim fatin e vendit përmes zgjedhjeve të parakohshme”.
Afati i ri i caktuar nga Brukseli është 12 Prilli, por një ndarje e ashpër pa marrëveshje, tashmë është gjithnjë e më e mundshme.