30 tregtarë janë gjobitur në tregun e Ostrenit që mblidhet çdo ditë të enjte. Policia bashkiake Bulqizë në bashkëpunim me Policinë e Shtetit ka vijuar sot aksionet për zbatimin rregullave dhe masave të ndërmarra kundër Covid-19.
Policia ndërhyri për të shpërndarë pazarin e organizuar çdo ditë të enjte në NjA Ostren, ku u detyrua të shpërndajë jo vetëm tregtarët, por edhe banorët që ishin mbledhur për të blerë produkte.
Ndërkohë, nga kontrollet e bëra u ndëshkuan me gjoba sipas akteve normative në fuqi rreth 30 tregtarë të cilët kishin shkelur standardet për tregtimin sipas rregullave.
Policia bashkiake u bën thirrje të gjithë qytetarëve, tregtarëve dhe shitësve ambulantë të jenë të kujdesshëm në zbatimin e rregullave. Aksionet do të vazhdojnë deri në momentin kur vendi të dalë nga kjo gjendje ku ndodhet.