Prokuroria e Tiranës ka ekzekutuar masën “Arrest në burg” për Nikoll Deda për kryerjen e veprave penale “Vjedhje e kryer duke shpërdoruar detyrën”, “Shpërdorim detyre” dhe “Veprime në kundërshtim me vendimin e gjykatës”,
Sipas prokurorisë Deda u denoncua nga shtetasi A.G. në Seksionin për Hetimin e Krimit Ekonomik e Financiar për shpërdorim të fondeve dhe se ka vepruar në kundërshtim me ligjin duke rritur buxhetin e “Urdhrit të Stomatologut” nga viti në vit.
“Në vitin 2020 ku buxheti ishte 38.500.000 lekë, në vitin 2021 e ka shtuar me 13.500.000 lekë më shumë. Në vitin 2022 buxheti ka shkuar në vlerën 125.837.000 lekë për arsye se ka blerë dhe godinë për institucionin, duke përfshirë dhe investimin që ka bërë brenda godinës”, njoftoi prokuroria.
Nga veprimet hetimore, sipas prokurorisë së Tiranës “rezultoi se ka dyshime të arsyeshme se gjithë rritja e buxhetit ka qenë me qëllim shpërdorimin e fondeve dhe përfitimeve personale për vete apo persona të tretë”,
Prokuroria pranë Gjykatës së Shkallës së Parë të Juridiksionit të Përgjithshëm, Tiranë çmon se në ngarkim të të dyshuarit Nikoll Deda ekziston dyshimi i arsyeshëm i bazuar në prova se ka konsumuar elementët e figurës së veprave penale “Vjedhje e kryer duke shpërdoruar detyrën”, “Shpërdorim detyre” dhe “Veprime në kundërshtim me vendimin e gjykatës”.
“Sipas informacioneve shtetasi Nikoll Deda është larguar dhe i është shmangur veprimeve hetimore të kryera nga policia gjyqësorë duke e bërë evident e konkret rrezikun e ikjes dhe shmangies nga përgjegjësia penale. Shtetasi në fjalë në cilësinë e Presidentit të Urdhrit të Stomatologëve lejoi punësimin e njerëzve pa kriter, familjarë të tij, me qëllim manipulimin e vendimmarrjeve të Këshillit Kombëtar nga viti 2016”, njoftoi prokuroria.
Prokuroria bëri me dije se pavarësisht se është marrë i pandehur dhe është aktualisht në proces gjyqësor i akuzuar në një tjetër procedim, ka ndërmarrë veprime aktive në shpërdorim të detyrës për përqendrim të mëtejshëm të kompetencave në duart e tij duke shfrytëzuar strukturat e USSH-së.
“Organi i Prokurorisë vlerëson se është e nevojshme marrja e masës së sigurimit personal ndaj shtetasit Nikoll Deda, pasi ekzistojnë shkaqe të rëndësishme që vënë në rrezik marrjen ose vërtetësinë e provës dhe ekziston rreziku që ai të largohet”, njoftoi prokuroria.