Në qytetin e Burrelit u përkujtua sot 82-vjetori i kryengritjes së madhe popullore të 3 mijë matjanëve kundër pushtuesve të huaj, një nga ngjarjet më të rëndësishme të qëndresës antifashiste në vend.
Në ceremoninë përkujtimore morën pjesë veteranë të luftës, deputeti Agron Malaj, drejtues të pushtetit vendor Mat e Klos, përfaqësues të institucioneve, nxënës shkollash dhe qytetarë të shumtë.
Kryetari i Organizatës së Veteranëve, Sefer Duka, dhe përgjegjësja e Muzeut Historik të Matit, Suzana Kurti, sollën për të pranishmit momente domethënëse nga kjo kryengritje e lavdishme, duke e cilësuar atë si një nga më të mëdhatë në vend gjatë Luftës së Dytë Botërore.
Në përfundim të aktivitetit, në obeliskun kushtuar kësaj ngjarjeje historike u vendosën kurora dhe tufa me lule në nderim të dëshmorëve dhe pjesëmarrësve të kryengritjes.
