Nuk kanë fund skandalet në FIFA, ku çdokush që ulet në poltronat e drejtuesve të lartë duket se shfrytëzon paratë që gjeneron futbolli botëror për qejfet personale. Pas keqpërdorimit që i kishin bërë Blater dhe ndihmësit e tij fondeve të kësaj organizate, duket se edhe Xhani Infantino po ecën në të njëjtat hapa.
Kreu i FIFA-s sot është akuzuar për “sjellje kriminale” nga Prokurori Special që mbulon veprimtarinë e institucioneve ndërkombëtare në territorin zviceran, mes të cilëve edhe FIFA-n. Prokurori Stefan Keler ka procedim penal duke kërkuar nisjen e çështjes gjyqësore ndaj Infantinos për keqmenaxhim fondesh të organizatës që drejton për përfitime personale. Infantino ishte nën hetim që në verë, por një nga prokurorët special, Mikael Lauber, u zëvendësua pasi u mësua se ai kishte kontakte të vazhdueshme me të jashtë çështjeve hetimore.
Prokurori i ri duket se nuk ndikohet nga FIFA e cila sot në emër të Infantinos u shpreh e “tronditur” nga ky hetim dhe argumentoi si “keqdashëse” akuzat e Keler.
Gjithçka ka të bëjë me një udhëtim me avion në prillin e vitit 2017 kur Infantino u kthye nga Surinami në Zvicër me një çarter privat të paguar 200 mijë euro nga fondet e FIFA-s. Kjo, pasi atij nuk i kishin pëlqyer udhëtimet e shumta që duhej të bënte për t’u kthyer me avionë linje nga ky vend për në Zvicër, ku do të kthehej në shtëpi. Si argumentim, në dokumentacionin e FIFA-s, u vebdos se udhëtimi me çarter ishte urgjent sepse ai duhej të takohej me presidentin e UEFA-s, Aleksander Çeferin. Por ky i fundit nuk ishte në Zvicër në ato ditë, por në Azerbajxhan dhe takimi në fjalë as që ishte në plan.
Prokurori special nuk u ngurrua të bënte akuza të forta në deklaratën e tij. “Ka sinjale të qarta të sjelljes kriminale nga Presidenti i FIFA-s”, shkruante ai ndër të tejra.