Jo vetëm në Greqi dhe Europë, por çështja “Beleri” ka shkuar edhe në Amerikë. Departamenti Amerikan i Shtetit i ka dërguar një tjetër mesazh autoriteteve shqiptare. Sipas DASH, qeveria amerikane pret që të ndiqet ligjit në rastin e Fredi Belerit.
Në përgjigje të një pyetjeje të korrespondentëve grekë në Uashington, një përfaqësues i Departamentit të Shtetit tha se “ne jemi në dijeni të rastit (të ndalimit të Fredi Belerit) dhe presim që autoritetet shqiptare të ndjekin një proces të rregullt sipas ligjeve të vendit)”.
Fredi Beleri mbahet në arrest prej 12 majit të këtij viti pasi u arrestua për blerjen e votave të 8 qytetarëve kundrejt 40 mijë lekëve. Arrestimi i tij ka shkaktuar një gjuhë të ashpër nga ana e Athinës zyrtare, me kërcënime dhe protesta.