Hetuesit ende nuk kanë përcaktuar shkakun e shpërthimit të ndodhur në një pikë karburanti në zonën e Brrylit në Tiranë, ku tre punonjës mbetën të lënduar.
Tre të lënduarit janë marrë në pyetje nga grupi hetimor, ndërsa në dëshmitë e tyre kanë deklaruar se në momentin e ngjarjes po furnizonin me gaz një automjet. Sipas tyre, ata nuk kanë dijeni se çfarë mund të ketë shkaktuar shpërthimin.
Në fokus të hetimit është edhe një bombol gazi, e cila ndodhej pranë godinës që u dëmtua dhe u shemb nga shpërthimi. Ekspertët po verifikojnë gjendjen dhe pozicionin e saj për të përcaktuar nëse mund të ketë pasur rrjedhje gazi.
Hetuesit po shqyrtojnë disa pista për zbardhjen e ngjarjes. Një prej tyre lidhet me automjetin që po furnizohej me gaz, ndërsa një tjetër me një defekt të mundshëm në pompën e furnizimit.
Paralelisht, po verifikohet edhe mundësia që shpërthimi të jetë shkaktuar nga rrjedhja e gazit prej bombolës.
Ekspertiza teknike dhe këqyrja e vendit të ngjarjes pritet të ndihmojnë në përcaktimin e shkakut të saktë të shpërthimit.
Ngjarja shkaktoi dëme të konsiderueshme në pikën e karburantit dhe në godinën pranë saj, ndërsa tre punonjësit e plagosur u transportuan për të marrë ndihmën mjekësore.