Pse FBI-ja shkoi në rezidencën e ish-presidentit të Shteteve të Bashkuara, Donald Trump në Florida? Sipas medias “CNN”, kjo u bë për të kontrolluar për dokumente shumë sekrete që kanë lidhje me armët bërthamore. Bastisja aspak e zakontë tregoi shqetësimin brenda qeverisë së SHBA-së për informacionin që mbante ish-presidenti në Mar-a-Lago dhe rrezikun se ai mund të përfundonte në duart e gabuara.
Trump deklaroi se nuk ka asgjë për të fshehur, pasi e quajti bastisjen anti-amerikane. Ngjarja e së hënës, ishte hera e parë në historinë amerikane që shtëpia e një ish-presidenti kontrollohej si pjesë e një hetimi penal. Trump dhe republikanë të tjerë e kanë dënuar masën si të motivuar politikisht.
Zhvillimi i fundit gjithashtu rrit më tej tensionet e një beteje ligjore në përshkallëzim pasi Prokurori i Përgjithshëm Merrick Garland i kërkoi një gjykate të zhbllokonte urdhrin e kontrollit dhe inventarin e dokumenteve që janë marrë nga shtëpia e Trump.
Në betejën e intensifikuar ligjore mbi kontrollin e kryer nga FBI-ja, Trump ka kohë deri sot për të sinjalizuar zyrtarisht nëse do të kundërshtojë kërkesën e Prokurorit Garland.