Moderatorët e përmbajtjes së rrjeteve sociale u kërkohet të nënshkruajnë një deklaratë duke u shprehur se e kuptojnë se puna mund tu shkaktojë PTSD, stresin post traumatik sipas raporteve.
Financial Times dhe The Verge shkruajnë se moderatorët e Facebook dhe Youtube, të punësuar nga kontraktori Accenture, u është dërguar një formular.
moderatorët monitorojnë materialet e pakëndshme dhe shpesh shohin qindra imazhe shqetësuese gjatë punës së tyre. Accenture tha se mirëqënia e punëtorëve të saj “ishte përparësi kryesore”.
Në një deklaratë kompania tha se vetëm punonjësve të rinj u është kërkuar të plotësojnë këtë formular ndërsa punonjësve aktuale u është dërguar në formë përditësimi.
“Ne përditësojmë rregullisht informacionin që u japim njerëzve tanë për tu siguruar që ata të kenë të qartë punën që bëjnë”, thotë kompania.
Accenture është një kompani shërbimi profesionale e kontraktuar nga firma si Google, Facebook, Twitter. Punonjësit e saj monitorojnë rrjetet sociale për të hequr materialet e papërshtatshme. Dhe shpesh puna kërkon që të shohin apo dëgjojnë postime të tmerrshme të natyrës së dhunshme apo seksuale.
Raporti vjen pasi Facebook po përballet me padi nga ish moderatorë të përmbajtjes për një sërë çështjesh të shëndetit mendor në Kaliforni dhe Irlandë.
Rastet e problemeve të shëndetit mendor apo stresit post-traumatik janë rritur mes moderatorëve të përmbajtjes. Në 2019 The Verge publikoi një raport për moderatorët e Facebook. Madje një prej tyre thoshte se “fle me armën te koka”, pas punës.
Megjithatë, ekspertët thonë se të kuptuarit e problemeve që mund të shkaktojë kjo punë, nuk i lehtëson rreziqet e saj.