Opozita proteston sot para Parlamentit, në vijim të protestës së 16 shkurtit. Policia ka paralajmëruar se do tentohet të futen njerëz në sallën e Kuvendit. Ndërsa kreu i Parlamentit, Gramoz Ruçi anuloi edhe seancën e sotme parlamentare.
Mbrëmjen e djeshme, Policia e Shtetit dhe Garda e Republikës, duke u nisur nga situata e krijuar kanë marrë masat duke vendosur një brez me tela me gjemba në të gjithë perimetrin e sallës së Parlamentit.
I gjithë perimetri i Parlamentit do të rrethohet gjithashtu nga një kordon me policë. Rreth 2 mijë forca të policisë do të jenë sot në protestë, një numër më i lartë efektivësh se ai i tubimit të 16 shkurtit.
Policia e Shtetit i ka bërë thirrje dje partive të opozitës që të distancohen nga skenarët e dhunës. Partitë do tentojnë të futen me forcë në sallën e Kuvendit dhe të krijojnë akte dhune, thuhej në njoftimin e një dite më parë të policisë.
“Nga informacionet e mbledhura nga shërbimet përkatëse, ka të dhëna për nxitje të dhunës dhe organizime me natyrë kriminale. Synohet hyrja me forcë në sallën e Parlamentit, duke ushtruar dhunë mbi personelin që ka detyrimin ligjor të sigurojë mbrojtjen e institucionit themelor të demokracisë”, theksojnë forcat e rendit.
Në komunikatën për mediat, thuhet se: “Policia e Shtetit e siguron opinionin publik, se forcat e rendit dhe sigurisë janë të gatshme t’i përgjigjen me forcën e ligjit dhe në proporcionalitet të plotë, çdo veprimi të paligjshëm apo akti dhune. Po ashtu, janë marrë të gjitha masat për identifikimin dhe skedimin e çdo individi që do të evidentohet si shkelës i ligjit, si edhe për ndalimin e për nxjerrjen e çdo shkelësi përpara drejtësisë”.