Agjencia Qendrore e Inteligjencës Amerikane (CIA) ka vlerësuar se Ukraina nuk ka qenë duke synuar një rezidencë të përdorur nga presidenti rus Vladimir Putin gjatë një sulmi të fundit me dronë në veri të Rusisë.
Sipas zyrtarëve amerikanë, ky vlerësim i është komunikuar presidentit të SHBA-ve, Donald Trump, nga drejtori i CIA-s, John Ratcliffe, duke hedhur poshtë pretendimin e bërë nga Kremlini.
Pretendimi u bë publik pasi vetë Putin i kishte thënë Trumpit në një bisedë telefonike se Ukraina kishte tentuar të godiste shtëpinë e tij. Trump e kishte përmendur më pas këtë deklaratë para gazetarëve, duke shprehur shqetësim për ngjarjen, çka la të kuptohej se ai i kishte dhënë besim versionit të liderit rus. Megjithatë, sipas CNN, vlerësimi i inteligjencës amerikane nuk e mbështet këtë narrativë.
Ukraina, nga ana e saj, i ka mohuar kategorikisht akuzat, duke theksuar se nuk ka kryer dhe nuk ka planifikuar asnjë sulm ndaj rezidencave personale të presidentit rus. Zyrtarët amerikanë theksojnë se analizat e CIA-s nuk tregojnë se objektivi i sulmit me dronë ka qenë një pronë e lidhur drejtpërdrejt me Putinin.
Që nga nisja e luftës në Ukrainë, Rusia ka akuzuar shpesh Kievin për tentativa sulmesh ndaj objektivave simbolike ose personale të udhëheqjes ruse, ndërsa Ukraina ka mohuar vazhdimisht pretendime të tilla. Akuzat dhe kundërakuzat janë pjesë e luftës së informacionit mes palëve, ku deklaratat publike shpesh përdoren për të ndikuar opinionin ndërkombëtar.