Koronavirusi i ka marrë jetën shkrimtarit nga Elbasani, Dhimo Tarusha. Shkrimtari ka ndërruar jetë pak orë më parë.
Mësohet se Tarusha ishte i shtruar në spital prej disa ditësh pasi ishte i infektuar me Covid 19.
Lajmin e kanë bërë të ditur familjarë të të ndjerit.
Tarusha është autor i 20 librave në dy zhanre: në novela dhe në romane. Krahas kësaj ai përfshin në krijimtarinë e tij edhe fushën e monografive letrare dhe jetëshkrimeve për personazhe të shquar të komunitetit vllah e më gjerë.
Në tërë krijimtarinë e tij novelisti e romancieri ka vënë në fokus zhvillimet historiko-sociale, psikologjike e botëkuptimore, në fushën e traditave, zakoneve dhe gjuhës së elementit vllah, duke e lidhur ngushtë me fatet e popullit shqiptar, të shoqërisë shqiptare në përgjithësi me të cilin kjo etni është integruar, duke u bërë pjesë organike, por edhe origjinale dhe e pandarë e saj.