Të paktën 7 lojtarë dhe dy anëtarë të stafit teknik tek Tottenham Hotspur kanë rezultuar pozitiv me COVID-19.
Situata duket alarmante aq sa ka detyruar drejtuesit e “gjelave” të njoftojnë UEFA-n, me shpresën që të mos zbresin në fushë për sfidën kundër Rennes në Conference League. Kjo vështirë se mund të ndodh pasi rregullat e UEFA-s janë të qarta, mjaftojnë 13 lojtarë, përfshi këtu edhe një portier që ndeshja të mos shtyhet. Më shumë se sa sfida me Renne, mund të shtyhet ndeshja me Brighton të dielën, në këtë rast gjithçka është në dorë të Premier League.
Gjithçka nisi të dielën e shkuar ku disa lojtarë shfaqën simptoma të virusit. Lojtarët iu nënshtruan të hënën testeve të shpejta por përgjigjet ishin kontradiktore. Lojtarët dhe stafi iu nënshtruan këtë të martë testeve molekulare ku përgjigjet ishin me të vërtetë shumë shqetësuese, 7 lojtarë dhe dy anëtarë të stafit drejtues rezultuan pozitiv. E sigurt është se nuk bëhet fjalë për Antonio Conte. Sipas media angleze, lojtarët dhe stafi i Tottenham janë të vaksinuar me dy doza.