Shtetet e Bashkuara të Amerikës i kanë ndaluar Sali Berishës dhe familjarëve të tij hyrjen në SHBA. Ndërkohë në deklaratën e bërë nga Departamenti Amerikan i Shtetit theksohet se shkeljet nga Berisha janë bërë veçanërisht në kohën kur ka shërbyer si kryeministër i Shqipërisë.
Amerikanët shkojnë edhe më tej duke paralajmëruar të tjerë emra në listën e zezë, pasi theksojnë se Berisha aktet korruptive i ka bërë në bashkëpunim me aleatët politik të tij.
“Në cilësinë e tij zyrtare si Kryeministër i Shqipërisë në veçanti, Berisha ishte i përfshirë në veprime korruptive, të tilla si shpërdorim i fondeve publike dhe ndërhyrje në proceset publike, duke përfshirë përdorimin e pushtetit të tij për përfitimet e tij dhe për të pasuruar aleatët e tij politikë dhe anëtarët e familjes së tij në shpërdorimin e besimit të publikut shqiptar në institucionet e tyre qeveritare dhe zyrtarët publikë.
Për më tepër, retorika e tij tregon se ai është i gatshëm të mbrojë veten, anëtarët e familjes së tij dhe aleatët e tij politikë në kurriz të hetimeve të pavarura, përpjekjeve anti-korrupsion dhe masave të përgjegjësisë.
Me këtë përcaktim, unë po rikonfirmoj nevojën për llogaridhënie dhe transparencë në institucionet demokratike të Shqipërisë, proceset qeveritare dhe veprimet e zyrtarëve publikë shqiptarë” – thuhet në deklaratën e DASH.
Kë ka pasuruar Sali Berisha duke abuzuar me pushtetin? Kë ka mbrojtur ai nga drejtësia? Cili apo cilët janë këta aleatë? – janë pyetje që do marrin shumë shpejt përgjigje. Dy emra që lakohen nëse lexohen nëntekstet e deklaratës janë Ilir Meta të cilin ndërhyrja e Berishës e shpëtoi nga videoja Prifti dhe Fatmir Mediu, bashkëpunëtor i Shkëlzen Berishës në Gërdec.