Seanca plenare për të miratuar dekretet e Presidentit Meta pritet të mos zhvillohet këtë javë.
Ndonëse Parlamenti është me pushime, dekretet e miratuara nga kreu i shtetit për emërimin e disa ministrave dhe shkarkimin e disa të tjerëve duket se do t’i sjellë në punë përpara kohe deputetët, raporton Panorama.
Konkretisht, Rregullorja e Kuvendit parashikon se Kuvendi zhvillon punimet në dy sesione plenare. Sesioni i vjeshtës fillon punën të hënën e parë të shtatorit, ndërsa sesioni i pranverës fillon punë të hënën e tretë të janarit, që përkon me datën 21 janar. Por afatet e përcaktuara në Kushtetutë për miratimin e dekreteve të Presidentit duket se do t’i sjellë deputetët në punë një javë më herët se ç’ishte parashikuar në ligj.
Neni 98 i Kushtetutës thekson se ministrat emërohen ose shkarkohen me propozim të Kryeministrit brenda 7 ditëve nga Presidenti. Po ashtu, edhe dekretet për emërimin apo shkarkimin e ministrit miratohen brenda 10 ditëve nga ana e Kuvendit.
Dekretet e Metës për shkarkimin e gjashtë ministrave dhe emërimin e katër propozimeve të Ramës u bë në datën 5 janar që për rrjedhojë, afati maksimal i mbledhjes së Kuvendit është data 15 janar.
Gjithsesi, deputetët e shumicës do të presin edhe ditët në vijim nëse kreu i shtetit do të krijojë bindjen për të shkarkuar edhe Ditmir Bushatin, si edhe emërimin e ministrave që vijnë nga shoqëria civile në mënyrë që votimi për ndryshimet në qeveri të bëhet në një seancë të vetme.