Publikohen pamjet të pak sekondave para aksidentit ku automjeti i 4 vajzave do të goditej nga Mercedezi i Behar Pemës pasditen e 13 shtatorit në dalje të tunelit të autostradës Tiranë-Elbasan.
Report TV që ka publikuar pamjet thotë se makina e drejtuar nga Pema vjen në korsinë e majtë dhe në dalje të tunelit sapo kish dalë automjeti Volkswagen i vajzave, ai humb drejtimin duke dalë në korsinë e djathtë dhe duke goditur makinën nga pas.
Goditja nga pas ishte aq e fortë në tre sekonda ku siç duket e në këto pamje dalja e tunelit është mbuluar nga pluhuri e tymi në formë mjegulle. Ky aksident mund të ishte edhe më fatal pasi tre mjete të tjera të cilat ishin duke udhëtuar në të njëjtën kohë pas tyre vetëm fati dhe refleksi i shoferit i ka shpëtuar.
4 vajzat ishin nisur nga Shkodra të festonin një datëlindje në Korçë. Aksidenti është shënuar në orën 18:55 minuta e 35 sekonda sipas orës së kamerës së sigurisë së tunelit e cila tashmë është administruar nga policia rrugore si pjesë e këtij hetimit. Në këtë aksident tragjik humbën jetën Lusinda Garunja 19 vjeç dhe Zheneta Qellia, ndërsa dy vajzat e tjera Denisa Dibra 25 vjeç dhe Nervina Garunja 24 vjeç mbeten të aksidentuara. Nga hetimet ka rezultuar se Behar Pema ndaj të cilit është caktuar arrest me burg ka qenë në gjendje të dehur.