Moti i keq ka shkaktuar dëme edhe në Durrës. Njëri kah i rrugës që lidh shëtitoren Taulantia me zonën e Currilave është bllokuar për qarkullimin e automjeteve. Shkak është bërë rrëshqitja e dherave nga Kodër Currila, duke përfunduar në rrugë.
Rrëshqitjet nisën si pasojë e reshjeve me intensitet të shiut të rëna përgjatë ditëve të fundit. Për të normalizuar situatën angazhuan punonjësit e ndërmarrjes ‘Rruga’ me mjete të rënda, me qëllim largimin e dherave nga rruga dhe kthimin e lëvizjeve të automjeteve në normalitet.
Në mungesë të një investimi afatgjatë erozioni në këtë pjesë të kodrës është i përvitshëm kryesisht gjatë stinës së dimrit. Në qershor të vitit 2014, Ministria e Mjedisit përmes një investimi me vlerë 240 milion Lekë nisi rehabilitimin e Kodrës, por nuk mundi ta zgjidhë problemin përfundimisht.