Kryetari i Partisë Demokratike, Sali Berisha, në takimin që mbajti në selinë blu me kryetarët e degëve në rrethe, theksoi se primaret kanë një rëndësi kapitale.
Gjithashtu, kreu i PD nuk i kurseu kritikat ndaj kryeministrit Edi Rama, për të cilin tha se për karrigen e tij është i gatshëm të zbatojë çdo urdhër.
Sipas ish-kryeministrit, në Shqipëri është instaluar shteti njëpartiak dhe se demokratët nuk arrijnë dot të gëzojnë të drejtat e tyre.
“Që një demokrat të gëzojë të drejtën që i takon e ka të pamundur se shteti një partiak garanton në mënyrë të paligjshme favoret e partisë që sundon në dhunim flagrant të parimeve demokratike. Mijëra demokratë që kanë fituar gjyqet e nuk marrin dot atë që u garantohet, mijërave nuk u shqyrtohen ankesat. Po më tregonte sot një demokrat, hapa një derë të një objekti në lidhje të plotë organikë, mbinë 4 inspektorë ndërtim pa leje, hapi derë në shtëpinë e dyqanin e tij, në një kohë kur kërcasin pallatet e Salillarëve e shtohet 10-15 kate e s’ndodh asgjë se janë klientelë e qeverisë. Tjetrit i vihet shiriti i krimit se është deputet i PD, se ka marrë me qira një ambient pa leje edhe pse nuk ishte e vërtetë. ministri bën show për pallatin ngjitur tij, të nesërmen pallati shton një tjetër kat. Demokratët jetojnë në diktaturë terrori e diskriminimi nga një njeri që vjedh shqiptarët nga mëngjesi në darkë.”
Sali Berisha akuzoi gjithashtu kryeministrin Edi Rama se ka nisur me manipulimin e zgjedhjeve lokale, të cilat do të zhvillohen vitin e ardhshëm.