Situata degjeneroi në konfrontim fizik në dy episode në seancën e sotme plenare. E para kur Flamur Noka hodhi në tokë një gardist dhe qëlloi me shishe në drejtim të Taulant Ballës. E dyta kur Petrit Doda u duk sikur hoqi rripin e pantallonave.
Në fakt Doda kishte shkulur mikrofonin e foltores, duke tentuar të godiste ministrat e ulur në sallë, si Taulant Balla apo të tjerë. I pyetur lidhur me këtë episod, ai shpjegoi pse ishte ndjerë i revoltuar, e madje hoqi live në studio rripin e pantallonave dhe e vendosi në tavolinë përgjatë gjithë kohës së bisedës.
”Ministri Manja, më vjen keq se është edhe Dibrani im, tha që jeni budallenj”, tregoi Doda. ”U ofendova në radhë të parë se e tha një ministër, dhe një dibran i imi. Kjo ishte arsyeja. Ishim në situatë shumë të qetë. Prisnim të kalonim edhe kodin zgjedhor”,-tha në ”A2cnn”.