Deputeti i Partisë Demokratike, Lefter Gështenja, pjesë e grupit të Enkelejd Alibeajt, thotë se hapi i parë i ftesës për të dalë me një kandidat të përbashkët, është që palët të ulen në një tryezë.
I ftuar në emisionin “Open”, ai theksoi faktin se nuk bëhet fjalë për bashkim, ndërsa e cilësoi jo të frytshme idenë e ish-kryeministrit për primaret.
“Çështja e bashkëpunimit, duhet të jemi korrekt. Deklarata e djeshme e grupit parlamentar nuk është vendim i marrë dje, pasi dje u finalizua. Ka më shumë se dy muaj që po punohet për këtë tezë. E djathta duhet me çdo kusht të dalë me një kandidat.
Puna u finalizua dje. Përpos debateve që kemi pasur dje, kemi qenë në mënyrë unanime dhe ishim dakord me atë deklaratë. Do bashkëpunojmë me çdo faktor dhe aktor në opozitë. Hapi i parë është të ulemi të diskutojmë. E kemi autorizuar zotin Bardhi si kontakt i parë për mënyrën se si duhet të bashkëpunojmë për zgjedhjet vendore.
Ky nuk është bashkim. Duhet të flasim për zgjedhjet vendore. Nëse flasin për primaret, s’jam kundër, por në momentin ku ndodhet sot opozita, primaret s’e favorizojnë këtë proçes. I japim mundësi një grupi që të përfitojë nga ky proçes. Bashkëpunim për zgjedhjet lokale, është dalja me një kandidat përballë kësaj maxhorance. Në mënyrë që PD dhe e djathta të ftojë zgjedhjet”, deklaroi ai.