Java e 6-të e Abissnet Superiores kulmon mbrëmjen e sotme me derbin e kryeqytetit Tirana-Partizani, që starton në orën 19:45 në “Air Albania” dhe premton për një 90-minutësh spektakolar e të luftuar në çdo cep të fushës.
Formacionet zyrtare:
Tirana (4-3-3):Bekaj; Ismailgeci, Hoxhallari, Behiratce, Toshevski, Najdovski, Toli, Limaj; Totre, Seferi, Ngo’o
Partizani (3-5-2): Hoxhaj; Sota, Belica, Saliou; A. Marku, Rrapaj, Murataj, Mala, Musta; Stenio Junior, Filipovic
Tirana vjen në këtë takim si skuadra që kryeson renditjen me 11 pikë dhe do të kërkojë ta mbajë këtë pozicion e vetme. Bardheblutë kanë fituar tre dhe barazuar dy nga 5 ndeshjet e luajtura, teksa nuk e kanë provuar ende shijen e humbjes.
Situatë krejt tjetër te Partizani, që nuk njeh ende fitore këtë sezon, pasi në 5 javët e para ka pësuar një humbje e më pas 4 barazime radhazi, ndaj do të kërkojë suksesin pikërisht në derbin e kryeqytetit.
161 takime janë luajtur deri tani mes Partizanit dhe Tiranës nga viti 1947-2021 në të gjitha kompeticionet, me “të kuqtë që numërojnë 68 fitore, kundrejt 42 të bardhebluve dhe 51 të tjerave që kanë përfunduar në barazim.
Sezonin e kaluar dy skuadrat u përballën katër herë në kampionat, nga të cilat dy përfunduan në barazim pa gola dhe dy të tjerë u fituan nga Partizani me rezultat të ngushtë 1-0 dhe 2-1.
Tirana vjen me grupin e plotë dhe trajneri Orges Shehi do të ketë mundësi të hedhë në fushë më të mirët.
Kolegu i tij Ilir Daja ka bërë llogaritë me tre mungesa si Kaçe e Cardoso që nuk janë grumbulluar dhe Cara që do të qëndrojë në pankinë për të shtrënguar dhëmbët në rast se do jetë nevoja për të në fushë.