Pas dëshmisë së të shoqes, biznesmeni Petit Laze ka rrëfyer para oficerëve të policisë ngjarjen e ndodhur disa ditë më parë, ku grabitësit i plagosën në shtëpinë e tyre.
Ai thotë se autorët kanë qenë dy dhe pasi u kanë kërkuar paratë kanë qëlluar mbi ta duke i lënë të plagosur. Ai ka thënë se grabitësit kanë qenë të veshur me pallto të zeza dhe të dy me armë në dorë.
Ata i kanë kërkuar kasafortën dhe më pas kanë tentuar ta lidhin me natriban por janë përleshur. Vetëm thirrjet e të bërtiturat kanë bërë që ata t’ia mbathin duke i lënë të plagosur burrë e grua.
“Dëgjova zhurmë që u hap dera dhe dola për të parë. Pashë dy të rinjtë të gjatë të maskuar dhe veshur me kapota të gjata dhe të zeza. Njëri kishte pistolete në dorë ndërsa tjetri një armë tjetër më të gjatë. Më thanë ‘duam lekët’! Ku e keni kasafortën?”. Në dorë mbanin një ngjitës natriban dhe u turrën të më lidhnin. U përleshëm dhe më qëlluan. Pastaj qëlluan dhe Afërditën. Ne ulëritëm, kërkuam ndihmë dhe ata u larguan me vrap”, ka thënë biznesmeni Laze.
Ndërkaq burime policore thonë se janë shpallur në kërkim dy persona, njëri prej të cilëve nga Skrapari, i afërm i çiftit Laze.