Dalin detaje lidhur me arrestimin e Dritan Memollës, një person me precedent penal dhe me rrezikshmëri të lartë për komunitetin. Ai u prangos pasditen e 9 gushtit 2023 pasi po lëvizte i armatosur me pistoletë me fishek në fole, të gatshme për qitje, informoi sot policia e Durrësit.
36-vjeçari kishte shkelur masën e sigurisë “arrest shtëpie” dhe lëvizte lirshëm nëpër qytet. Memolla ndërsa ka tentuar që t’i largohet policisë ka hedhur pistoletën. Dy vite më parë u arrestua pasi aksidentoi për vdekje një person, ndërkohë po ashtu në vitin 2018 ka shkaktuar një tjetër aksident me vdekje.
“Ky shtetas u kap në flagrancë teksa lëvizte me këmbë, në lagjen nr.15, dhe gjatë kontrollit fizik të tij, Policia i gjeti 1 armë zjarri pistoletë me fishek në fole, të gatshme për qitje. Nga verifikimet ka rezultuar se 36-vjeçari kishte thyer masën e sigurisë “Arrest në shtëpi”, të caktuar për një aksident rrugor, me pasojë vdekjen. Gjithashtu, ky shtetas kishte precedent të theksuar penal për krime në fushën e narkotikëve. Në vijim, pistoleta dhe krehri i saj me fishekë luftarak, u sekuestraun në cilësinë e provës materiale”,-informoi sot policia e Durrësit.