Detaje të reja dalin nga ngjarja e rëndë në fshatin Labovë Zhapës të Gjirokastrës, ku një 60-vjeçar mbeti i vrarë me sende të forta pas një konflikti për pronën.
Viktima ishte Andrea Xhavara ndërsa autori i dyshuar i ngjarjes së rëndë është Jano Koleta.
Xhavara mbërriti pa shenja jete në spitalin “Omer Nishani” në Gjirokastër ndërkohë që autori mësohet se është arrestuar në shtëpinë e tij ku dukej se po priste qetësisht policiët dhe nuk ka bërë rezistencë.
Burimet nga Policia theksuan se autori ka tentuar t’i jepte ndihmën e parë viktimës në vendin e ngjarjes, por ka qenë e pamundur. 60-vjeçari ka humbur jetën në vend, ndërsa transporti i tij në spital ka qenë pa rezultat.
Koleta ka qenë në gjendje të rënduar psikologjike, për gjithë atë çfarë kishte ndodhur. Lidhur me këtë ngjarje, policia ka shoqëruar në polici edhe familjarët e autorit dhe viktimës.
Këta të fundit kanë dhënë dëshmitë e tyre lidhur me konfliktin e dy shtetasve, çka degradoi më pas duke shkaktuar një viktimë. Ata janë shprehur se konflikti ka ndodhur pas disa problemesh që kishin me tokat, të cilat ishin afër me njëra-tjetrën.