Kandidati i PS për qarkun e Dibrës Dionis Imeraj shpreh bindjen se e majta do të arrijë objektivin elektoral në zgjedhjet e 25 prillit. Përmes një postimi në rrjete sociale, Imeraj thekson se nuk ishte një zgjedhje e lehtë midis lënies së mandatit të votbesuar para 1 viti e gjysmë si kryebashkiak dhe kësaj “beteje”.
Postimi i plotë:
Një sfidë dhe përgjegjësi e re vetëm për vendlindjen time e bashkëqytetarët e mi!
Të dashur dibranë!
Siç tanimë jeni informuar, kam vendosur t’i bashkohem padiskutim ekipit fitues të Partisë Socialiste për qarkun Dibër në zgjedhjet e 25 Prillit e të përfaqësoj Dibrën në Kuvendin e Shqipërisë.
Absolutisht që nuk ishte një zgjedhje e lehtë midis lënies së mandatit të votbesuar para 1 viti e gjysmë nga ju si kryebashkiak dhe kësaj “beteje”, por duke ditur nga afër çdo problematikë, çdo hall, çdo shqetësim tuajin, çdo mundësi e oportunitet që ofron Dibra, dëshira për të qenë një zë i fuqishëm i Juaji, dhe i kësaj krahine me potencial të jashtëzakonshëm, prevaloi mbi detyrën që mbaja.
Kini besim se çdo punë e mirë, çdo investim i nisur nga unë në bashkinë e Dibrës, do të vijojë njësoj, me të njëjtin përkushtim, sepse Dibra si kurrëherë më parë, është në rrugën e duhur të transformimit e zhvillimit!
Duke kërkuar mirëkuptimin e gjithsecilit prej jush, dhe duke ju falenderuar nga zemra për mbështetjen e pakursyer që më keni dhënë deri më tani në administrimin e bashkisë Dibër, zotohem që në edhe në vazhdim do të jem shërbëtori juaj!
Duke shpreh mirënjohjen e thellë për besimin e dhënë Partisë Socialiste të Shqipërisë dhe kryetarit Edi Rama, bashkë me ekipin tjetër do të angazhohem maksimalisht për arritjen e objektivave të vendosura për zgjedhjet e 25 Prillit.
Faleminderit!
Shqipëria e Ardhmja Jonë!
Dibra e Ardhmja Jonë!