Dibër, asnjë ankesë për hetimin tatimor

Qytetarët e Dibrës asnjë ankesë për Hetimin tatimor. Ky lajm bëhet i ditur në një debat mes deputetit të Partisë Demokratike për qarkun Dibër Xhemal Gjunkshi dhe Drejtorit të Drejtorisë Rajonale Tatimor Dibër, Alfir Shima.
Në një status në facebook Deputeti Gjunkshi akuzoi hetimin tatimor të Shkodrës se po intimidon bizneset Dibranë me qëllim që të mos bëhen pjesë e protestës së thirrur nga Partia Demokratike në datën 16 mars. Gjunkshi akuzon drejtorin Rajonal të Tatimeve që po harton lista sipas bindjeve politike. Por, i menjëhershëm ka qenë reagimi i këtij të fundit, i cili i bën me dije deputetit Gjunkshi se në adresë të kësaj drejtorie nuk ka qoftë edhe një ankesë të vetme nga biznesi dibran. “Si drejtori tatimore ne kemi bërë vetëm detyrën dhe jemi përpjekur qe t’i vijmë në ndihmë biznesit në të gjitha rastet, kjo është arsyeja qe Drejtoria Tatimore Dibër ka rezultate të larta në realizimin e detyrave dhe nuk ka as edhe një ankesë si ne Portalin e Bashkëqeverisjes ashtu dhe kudo”, shkruan Shima në përgjigjen e tij. Ai përfundon duke e siguruar deputetin se në kjo drejtori e cila ka në përbërje të saj specialiste me bindje të majta dhe të djathta ka vetëm një prioritet, zbatimin e ligjit dhe vendosjen e një marrëdhënie të hapur me biznesin.