Dy persona, banorë të Matit dhe Bulqizës, kanë rezultuar të infektuar me koronavirus. Mësohet se ato janë infektuar në spitalet e kryeqytetit, teksa trajtoheshin për sëmundjet që mbartnin.
Bulqiza deri sot ishte një nga zonat e gjelbra në vend, nuk kishte asnjë person të prekur nga Covid 19. Sot paradite autoritetet shëndetësore deklaruan se një minator, 56 vjeçar, kishte rezultuar pozitiv. Minatori me probleme të tjera shëndetësore kishte dalë një ditë më parë nga spitali, por para daljes atij i është marrë tamponi. Pas analizave ai ka rezultuar i infektuar dhe kjo ka bërë që 56 vjeçari të izolohet bashkë me pjestarët e tjerë të familjes. Dy djemtë e minatorit janë punëtorë në minierën e kromit dhe firma konçesionare mund të kërkojë kryerjen e analizave për të gjithë punonjësit e saj, për të parandaluar prekjen e qindra minatorëve.
Po ashtu një grua 72 vjeçare, banore e Matit, e shtruar në QSUT disa ditë më parë ka rezultuar se është e infektuar nga koronavirusi. Mësohet se në dhomën ku ajo kurohej kanë rezultuar të infektuar edhe persona të tjerë. Autoritetet e Shëndetit Publik Mat kanë vendosur të jenë pranë familjes të të moshuarës për t’u kërkuar atyre karantinimin dy javor dhe për t’u marrë analizat. /tirananews.al/