Reshjet e dendura të shiut dhe dëborës kanë krijuar jo pak probleme për banorët e Qarkut Dibër, sidomos në bashkitë Klos, Bulqizë e Peshkopi.
Shtabi i Mbrojtjes Civile pranë Prefekturës Dibër ka grumbulluar gjithë informacionin e gjendjes së fundit në këtë zonë.
Mësohet se rruga që lidh Urën e Çerenecit me Klenjën ka qenë e bllokuar për shkak të reshjeve të dëborës. 6 fadroma të marra me qera kanë nisur punën për zhbllokimin e rrugës. Po tentohet që ajo të bëhet e kalueshme, të paktën me zinxhirë.
Edhe segmenti Qafa e Buallit-Martanesh paraqet probleme. Bëhet me dije se reshjet e dëborës të shoqëruara me erë të fortë kanë grumbulluar sasi të mëdha dëbore në disa vende, duke e bërë rrugën të pakalueshme.
Edhe në njësinë administrative Xibër, të bashkisë Klos raportohen dy fshatra të bllokuar për shkak të trashësisë së dëborës.
Zyrtarët e Prefekturës Dibër shtojnë se në njësitë Ostren, Trebisht e Derjan ka patur ndërprerje të energjisë elektrike për shkak të situatës së motit.