Drejtoria e Emergjencave Civile pranë Bashkisë Mat dhe Komisariati i Policisë sqaruan rrethanat e ngjarjes së rëndë që u regjistrua sonte në qytetin e Burrelit. Sipas tyre zjarri ka rënë fillimisht në njërën prej banesave që kanë çati të përbashkët dhe pastaj është përhapur me shpejtësi edhe në katër banesa të tjera.
Shumë shpejt në vendin e ngjarjes kanë mbërritur zjarrëfikësit e bashkive Mat e Klos, të ushtrisë, ambulanca e spitalit bashkiak, efektivë të policisë së rendit, specialistë të OSSH-së, të cilët në bashkëpunim mes tyre mundësuan pas dy orësh shuarjen e plotë të zjarrit.
Mes 16 banorëve të shpëtuar janë edhe 6 fëmijë të 5 familjeve që humbën gjithçka. Familjet E. Pjetri, F. Bushati, S. Skila, D. Zenelcanaj, I. Lika sonte janë strehuar pranë të afërmve të tyre, ndërkohë po merren masa për strehimin e tyre nga Bashkia Mat.
