Rrugët e Suedisë dhe Finlandës mund të ndahen, pasi vetë Finlanda duhet të konsiderojë anëtarësimin në aleancën e NATO-s pa Suedinë. Të dyja vendet nordike kishin nisur një ofertë të përbashkët për t’u anëtarësuar në NATO, por Suedia po përballet me bllokadën turke për të aderuar në aleancë.
Ministri i Jashtëm i Finlandës, Pekka Haavisto, tha se një aplikim i përbashkët është “opsioni i parë” por duhet të merren parasysh të dyja mundësitë. Të gjitha vendet anëtare të NATO-s duhet të miratojnë anëtarësimin e vendeve që aplikojnë dhe gjasat janë që Turqia nuk do ta miratojë ofertën e Suedisë pas tensioneve të fundit.
Një kopje e Kuranit u dogj gjatë një proteste jashtë ambasadës turke në Suedi – duke zemëruar zyrtarët në Turqi. Presidenti turk, Rexhep Tajip Erdogan tha se protesta ishte një fyerje për të gjithë, veçanërisht për myslimanët, dhe ishte zemëruar me autoritetet suedeze që lejuan të zhvillohej demonstrata.