Lavdrim Sahitaj, kryeinspektor i Inspektoriatit Shtetëror të Mbikëqyrjes së tregut, tha se ISHMT ka dyfishuar kontrollet dhe inspektimet në terren për të bërë të mundur vlerësimin e produkteve që do të blihen nga konsumatorët shqiptarë.
Ndër të tjera, ai dha edhe një lajm sa u përket lodrave për fëmijët, për të cilat tha se disa prej tyre do të ndaloheshin të shiteshin dhe do të sekuestroheshin, nëse nuk kanë markimin CE, pra nëse nuk janë të certifikuar si të sigurta.
Sahitaj tha në “Fax” Tv se kjo masë vinte si pasojë e përbërjes së këtyre objekteve, që përmbanin edhe substanca që mund të dëmtojnë fëmijët. Ai tha se duhet që edhe vetë konsumatorët të ndërgjegjësohen e të kontrollojnë nëse lojërat që do blejnë kanë certifikimin e duhur.
“Kanë elementët kimikë jashtë kontrollit, janë lehtësisht të thyeshme që mund të bëhen shkak për gëlltitjen nga fëmijët. Janë disa lodra që përdoren si antistres për të luajtur nga fëmijët, të cilat përmbajnë xhelatinë. Të kenë kujdes me këta lodra, sepse janë të rrezikshme, kanë lëvizje të forta. Por të shohim nëse janë të kolauduara, të shoqërohen me prindër”, tha Sahitaj.
I pyetur a janë kryer inspektime duke parë se ka lodra në mes të sheshit “Skënderbej” në Tiranë, ai tha: “Po, kemi bërë inspektime. Janë lodra që vijnë nga vendet e BE dhe kjo është një garanci, por ne e kemi bërë punën tonë me kontrollin dhe testimin. Ka një procedurë të ngjashme me kolaudimin e makinave dhe nëse këto lodra nuk e kalojnë dot, Bashkia nuk jep leje për përdorimin e tyre.
Sa u përket ashensorëve, Sahitaj tha: Janë problem i madh, i akumuluar ndër vite. Tani ministria e Financave dhe Inspektoriati po punojnë ngushtë për të trajtuar certifikimin e ashensorëve. Më parë, lejet e shfrytëzimit të pallateve merreshin pa u vendosur ashensorët. Ne kemi ndërhyrë dhe kjo gjë nuk është më e lejueshme. Nga ana tjetër, kemi ashensorët që duhet të certifikohen në regjistrin CE.