Ish-presidenti amerikan Donald Trump nuk do të kthehet në Twitter edhe pse Elon Musk bleu kompaninë e mediave sociale. Twitter të hënën pasdite njoftoi se ra dakord me ofertën e Musk, i cili e bleu kompaninë për 44 miliardë dollarë.
Donald Trump i tha Fox News të hënën se ai do t’i bashkohet Truth Social gjatë javës së ardhshme ashtu si e kishte planifikuar.
“Unë nuk do të shkoj në Twitter. Unë do të qëndroj në Truth”, tha Trump për Fox News.
“Shpresoj që Elon ta blejë atë sepse ai vërtetë do të bëjë përmirësime dhe ai është një njeri i mirë”, deklaroi ai.
Platforma e mediave sociale Trump Media & Technology Group, TRUTH Social, u lançua zyrtarisht muajin e kaluar dhe ka funksionuar nën shërbimet e saj të reja cloud për katër ditë, pasi ishte testuar që nga shkurti. Devin Nunes është CEO i kompanisë.
“Ne po marrim miliona njerëz dhe ajo që po gjejmë është se përgjigja në TRUTH është shumë më e mirë sesa të jesh në Twitter,” tha Trump.
Trump u pezullua përgjithmonë nga Twitter, Facebook, Instagram dhe Snapchat pas trazirave të 6 janarit 2021 në Kapitol. Twitter i konsideroi një numër të postimeve të tij të lidhura me protestat si nxitëse të mëtejshme të dhunës.