Sot pasdite është zyrtarizuar dorëheqja e administratorit të klubit të futbollit “Burreli”, Bajram Ballabani. Për tri vite me radhë ai dha kontributin e tij për mbarëvajtjen e skuadrës matjane.
Në takimin e organizuar në mjediset e stadiumit “Liri Ballabani” administratori falenderoi kryetarin e bashkisë Agron Malaj, futbollistët, trajnerët, mirëmbajtësit e terreneve sportive dhe sidomos tifozët për bashkëpunimin dhe mbështetjen e treguar gjatë këtyre viteve.
“Administratori Bajram Ballabani largohet për arsye personale nga drejtimi i klubit, tha kryetari i bashkisë Mat Agron Malaj. Ky nuk është largim për shkak të rezultateve, sepse ne jemi me rezultate shumë të mira, dhe do t’i vazhdojmë kështu. Është bërë një punë shumë e madhe prej tri vitesh. Unë e falenderoj përzemërsisht për të gjithë punën që ka dhënë Ballabani”, shtoi Malaj.
Duke vijuar kryebashkiaku pohoi se: “Unë e falenderoj edhe si bashkëpunëtorin tim më të ngushtë gjatë këtyre viteve që ta ngrinim këtë ekip nga gjendja në të cilën e morëm dhe ta shohim në gjendjen që është sot dhe pretendojmë për ta çuar akoma më lart, drejt Superligës. Unë e di që ai do të vazhdojë të jetë pjesë e jona pasi ka 40 vite që e ndjek skuadrën kudo si ndër tifozët më besnikë të saj. Unë e falenderoj përzemërsisht për të gjithë punën që ka bërë dhe i uroj suksese në jetë e angazhimet personale.”
Aktualisht Burreli renditet në vendin e pestë në Kategorinë e Parë.