Deri më tani mësohet se kryebashkiaku i Vlorës, Dritan Leli ka shkarkuar drejtorin e ujësjellësit
Tensione mes zyrtarëve të Bashkisë së Vlorës dhe atyre të Ujësjellësit! Ditën e sotme, një përplasje ka ndodhur në Vlorë, duke bërë që ish-drejtori i Ujësjellësit, Shkëlqim Leskaj dhe të tjerë të përfundojnë në Komisariatin e Vlorës. Ndërkohë që në Komisariat përveç tyre ka shkuar edhe kryebashkiaku i Vlorës, Dritan Leli, i cili ka shkuar për të sqaruar ngjarjen.
Deri më tani mësohet se kryebashkiaku i Vlorës, Dritan Leli ka shkarkuar drejtorin e ujësjellësit Shkëlqim Leskajn prej katër ditësh, por ky i fundit refuzon që të lirojë zyrën. Sipas drejtorit të Ujësjellësit, shkarkimi i tij është i paligjshëm, pasi ndërmarrja është aksionere dhe të drejtën për shkarkimin e tij e ka vetëm bordi ekzekutiv.
Për të plotësuar këtë “kusht”, sot pranë zyrës së drejtorit të Ujësjellësit, ka shkuar bordi drejtues, kryebashkiaku dhe nënkryetari, duke i kërkuar të lirojë zyrën pasi është i shkarkuar. Por pikërisht në këtë moment Shkëlqim Leskaj, ka njoftuar Policinë duke denoncuar se i kishin uzurpuar zyrën. Kështu të gjitha palët janë marrë në Komisariat për të dhënë sqarimet e tyre për përplasjen.
Po ashtu numri një i Bashkisë së qytetit, Dritan Leli ka ngritur akuzë për Shkëlqim Leskaj për vjedhje të librave të protokollit, vulës së institucionit. Paraprakisht mësohet se Leskaj ka firmosur 3 tendera: 400 mijë euro për sahatet e ujit, klorifikimin dhe uniformat për punonjësit e Ujësjellësit, megjithatë pritet që gjiithçka të konfirmohet me një njoftim zyrtar nga Policia. Po ashtu deri më tani nuk ka asnjë komunikim as nga numri një i Bashkisë.