Tabletat me ngjyrë kanë joshur qindra të rinj që i shohin si argëtim apo si eksperienca të re pa e ditur se tableta që tregtohet nën emrin ekstazi mund t’u marrin jetën.
Më shumë se 1 mijë tableta ekstazi janë sekuestruar nga policia vetëm gjatë dy muajve të parë të këtij viti. Referuar statistikave të policisë së shtëtit në vendin tonë vitin e kaluar janë sekuestruar në operacione të ndryshme rreth 3 kilogram ekstazi si dhe sasi më të vogla të drogave të tjera çka tregon edhe masivizimin e shpërndarjes së drogave sintetike në vend.
Nga viti në vit është vërejtur një shtim i drogave sintetike të përdorura në vendin tonë çka reflektohet edhe në aksionet e policisë. Nëse në vitin 2013 drogat sintetike si Metadoni apo Fentermina kapeshin rreth 100 gram tashmë kapen disa fish. Shumë prej këtyre drogave nuk janë as të dedektueshme në laboratorët mjekësorë.
“Nën emrin ekstazi hyjnë shumë dogra por kanë përmbajtje krejtësisht të ndryshme. Disa nuk janë edhe të dedektueshme nga analizat mjekësore por ne shohim efektet që japin në organizëm që ndryshojnë nga drogat tradicionale”, tha Amarda Gashi-toksikologe.
Ndërsa përdorimi i drogave sintetike po fut në kthetra shumë të rinj shumë pak flitet për efektet e tyre në organizëm. Këto dogra shkaktojnë dëme të pakthyeshme deri edhe tek humbja e jetës.
“Dëmet në organizëm nga këto dogra janë të mëdha sidomos në aspektin psikologjik japin depresion, ankth, ide suicidal por edhe tension të lartë, problem kardiake deri në humbje jete”, shtoi më tej Amarda Gashi-toksikologe.