Mbrëmë u mbajt nata e parë e festivalit ”Kënga Magjike 2024”. Mes shumë momenteve, një spikati dhe po vlerësohet pa masë. Dylan Reka konkurron me këngën “Froni”, e cila është pritur mjaft mirë nga publiku, por ai mbrëmë u përball me një problem teknik gjatë performancës së tij.
Artisti u detyrua që të ndalonte performancën sapo nisi të këndonte, sepse nuk dëgjonte muzikën në kufje. Teksa nisi të këndonte sërish shihet që u përball me të njëjtin problem, por nuk ndaloi këndimin. Dylan vazhdoi këngën me gjithë fuqinë e zërit të tij dhe pavarësisht problemit teknik dha një performancë të jashtëzakonshme.
Kështu Dylan na vërtetoi se një artist di të tejkaloj çdo vështirësi teknike, sepse talenti është mbi teknikën. Kjo performancë po pëlqehet pa masë dhe po vlerësohet nga kushdo në rrjete sociale.